Elimi-obamı salamat görüm, Şikəstim olmasın, şilim olmasın, O kəsdən çəkinim, qorxum ki barı Dəvəsindən böyük filim olmasın.
Xəbis kəc baxmasın mənə kəl kimi, Kəsməsin yolumu bir heykəl kimi, Gözüm hüzurunda kölgəlidimi, Sözümü diməyə dilim olmasın?!
Sevinin, sevənlər çoxsa dünyada, Hər gözdən bir günəş doğsa dünyada, Məndən gül istəyən yoxsa dünyada, Əl atım, üzməyə gülüm olmasın.
Sözlərim bar tutur, dərsin insanlar, Əsl qiymətini versin insanlar, Əlimin xeyrini görsün insanlar, Xeyirsiz işlərdə əlim olmasın.
Qapımda qonaq var, süfrəmdə çörək, Qürurla çırpınır sinəmdə ürək, Əvvəli-axırı nəyimə gərək, Ömrün ortasında ölüm olmasın. |
