Nə gözəl açılıb yol qırağında,
Nə gözəl açılıb bu çiçək, Allah,
Kövrək məqamında, həzin çağında,
Könlüm bu çiçəyə gətirdi pənah.
Allahın nə gözəl günüymüş bu gün,
Qəmlənmək nə boyda qəbahət imiş,
Bir insan ömrünü uzatmaq üçün
Bir gülün açmağı kifayət imiş.
İlhamım torpağı köksünə sıxdı,
Sarımtıl yelənli yaşıllıq kimi,
Bu gün də bu çiçək qarşıma çıxdı,
Kimsəyə etdiyim yaxşılıq kimi.
Göydən gün işığı- sevinc tökülür,
Səmanı torpaqdan gəl ayır burda,
Burda qlobusun gözləri gülür,
Dünyanın çiçəyi çırtlayır burda.
Yeridim, bu çiçək qarşıma gəldi,
Torpaqmı dikəldi, mənmi əyildim,
Bu şeri oxudum, xoşuna gəldi,
Mənə gül uzatdı yer elə bildim.
|
