Arxası qışadı, üzü bahara, O hansı buluddu, üzür bahara, Dikildi hamının gözü bahara, Nə gözəl açıldı bu yaz səhəri.
Çağlayan çayların dişi göründü, Qışın zirvələrdə leşi göründü, Çılpaq qayaların döşü göründü, Nə gözəl açıldı bu yaz səhəri.
Tutaşan tonqalın közləri kimi, Yeriyən şəfəqin izləri kimi, Sevdiyim gözəlin gözləri kimi Nə gözəl açıldı bu yaz səhəri.
Haçandı görmürdüm dağda günəşi, Deyirdim, zülmətmi boğdu günəşi?! Sanki ürəyimdən doğdu günəşi, Nə gözəl açıldı bu yaz səhəri.
Səma sevinməzdi, gün gülməsəydi, Gülüb də torpağı güldürməsəydi, Mən elə bildim ki, gül düyməsidi, Nə gözəl açıldı bu yaz səhəri.
Həyat bir yuxudu sübh namazında, Yer cənnət qoxudu sübh namazında, Bir nəğmə oxudum sübh namazında- Nə gözəl açıldı bu yaz səhəri.
|
