Yaşıllıq çəməni tərk edən kimi,
Çiçək yasəməni tərk edən kimi,
Novruzu səməni tərk edən kimi,
Tərk edir cavanlıq, tərk edir məni.
Gözümdə son damla yaş olub gedir,
Sinəmdə bir parça daş olub gedir,
Uçan durnalara qoşulub gedir,
Tərk edir cavanlıq, tərk edir məni.
Dağın çən köynəyi sökülən sayaq,
Yarpaqlar saralıb tökülən sayaq,
Dalğalar sahildən çəkilən sayaq,
Tərk edir cavanlıq, tərk edir məni.
Axan ulduzlar tək sönür ömür-gün,
Taxtından-tacından enir ömür-gün,
Bostan urasına dönür ömür-gün,
Tərk edir cavanlıq, tərk edir məni.
Qürubun qızıla boyanan çağı,
Kövrək duyğuların oyanan çağı,
Göstərib sonuncu dayanacağı,
Tərk edir cavanlıq, tərk edir məni.
|
