Darasın telini sözlərim sənin,
Tutaşsın köksündə közlərim sənin,
Belə ki, tutubdur gözlərim səni,
Mən sənin qəlbini fəth edəcəyəm.
Məhəbbət yoludur yolu Tanrının,
Sev ki, sevənlərdir qulu Tanrının,
Gülüm, rüsxətiylə ulu Tanrının
Mən sənin qəlbini fəth edəcəyəm.
Həsrətim sığışmır nə yerə, göyə,
Sevinc axtarıram qəm yeyə-yeyə,
Sən məni ömürlük sevəsən deyə
Mən sənin qəlbini fəth edəcəyəm.
Görürəm hüsnünü, tutulur dilim,
Dinə bilməyənə susmaq da zülm,
Məni işğalçıya bənzətmə, gülüm,
Mən sənin qəlbini fəth edəcəyəm.
Dərdin qarşısına sədd qoya-qoya,
Xain ürəklərə çat qoya-qoya,
Fateh İsgəndəri mat qoya-qoya
Mən sənin qəlbini fəth edəcəyəm.
Qara xətt çəkilsin naşı üstündən,
Daş gərək aşırsın daşı üstündən,
Keçib Everestin başı üstündən
Mən sənin qəlbini fəth edəcəyəm.
Getmə, bu sevginin getmə əksinə,
Tək sənə möhtacam, gülüm, tək sənə,
Eşqin bayrağını sancıb köksünə,
Mən sənin qəlbini fəth edəcəyəm.
|
|
