Neçə sərt uçurum, neçə dik qaya,
Aşsam da, ölümdən qorxmadı gözüm,
Həsrətin Çin səddi çəkdi araya,
Sağında mən qaldım, solunda özün.
İndi vüsalına sarı gəlirsən,
Sındıran dərd idi, qəm idi səni,
Donmuş dəryaları yarıb gəlirsən,
İnamın buzqıran gəmidir sənin.
Gəl ki, sorağını alandan bəri,
Çoxalıb səksəkəm, çəkilib yuxum,
Qaçar muştuluğa ayaq səslərin,
Gəl ey gəlişinə qurban olduğum. |
