Vüsal cüt yaşanır, ayrılıqsa tək,
Fələyin çərxini sandım oyuncaq,
İnadım sonuncu buğumunadək,
Yanıb qəm odunda kül olmayınca,
Məni bağışlama.
Yolum kipriyinin ucundan keçir,
Süzdür gözlərini, sal məni dərdə,
Günahından keçib, suçundan keçib,
Adam öldürəni əfv etsələr də,
Məni bağışlama.
Odla oynamışam, bilməyib, odla,
Günüm gah qüssəli, gah da şad keçib,
Ölüm, cəsədimin üstündən adla,
Amma günahımın üstündən keçib,
Məni bağışlama.
Həsrət alovunda alışsın könül,
Göz yaşı tökdürən, göz yaşı içər,
Günlərin bir günü adam dönüb,
Gəlməsəm üstünə əlimdə çiçək,
Məni bağışlama. |
