Səadət gətirsin, sevinc gətirsin Qızların toyuna nişan üzüyü, Yarın barmağından çıxmasın əsla, Düşməsin oyuna nişan üzüyü.
Ərzin sükançısı sevənlər olsun, Sevənlər həmişə xoşxəbər olsun, A zərgər, çalış ki, bərabər olsun Qızların sayına nişan üzüyü.
Gözəl qız, aldanıb dövlətə-ada, Arabir xəlvəti meyl etmə yada, Baxma ki, qızıldır, qızıl olsa da, Yetişməz hayına nişan üzüyü.
İsti yatağından qoparar səni, Qorxutmaz nə yağış, nə də qar səni, Əgər sevirsənsə, aparar səni Ərzin o tayına nişan üzüyü.
Mirdamət, seyrinə gəl ulduzların, Ağlama halına vəfasızların, Sevdiyim qız kimi bütün qızların Düşəydi payına nişan üzüyü! |
