Şöhrət fişəngində şanın nur saçıb, Lütf edib, suçuna bir baxarmısan, Sevdiyin gözələ telefon açıb, Adsız yüksəklikdə ad çıxarmısan.
Bu nə əhvalatdır, danış görüm bir, Duyuram, qəlbini həsrət yandırır, O sevgi gözünün nur mənbəyidir, Gecələr sərhədi işıqlandırır.
Bir bax, komandirin səsi nə titrək, Qəzəbə köklənib könlünün simi, Deyir, sərhədin də keşiyini çək, O qızın nazını çəkdiyin kimi.
Nüfuz qazanılır alın təriylə, Məhəbbət sönəndə həyat da sönür, Vətən müqəddəsdir sevgiləriylə, Sevgisiz məmləkət qürbətə dönür.
Yüz əsgər könlündə min büsat qurdun, Əməl, əməl olur, tutsa yerini, Bir gözəl eşqinə qorunan yurdun Bir el basa bilməz sərhədlərini.
Gedib o zabitə söyləyəkmi biz, Məhəbbət qəlblərə cəsarət çilər, Sevən baxışlarla sərhədlərimiz Daha etibarlı qoruna bilər.
Baxıram çöhrəndə saralan gülə, Kim deyir, gözlərin dolmayır, əsgər, Sevgilər hüdudsuz olsa da belə, Vətənlər sərhədsiz olmayır, əsgər.
Köksündə sevgidən bir imarət qur, Dondura bilərmi söz məhəbbəti, Sərhədi yağıdan əsgər qoruyur, Əsgəri soyuqdan öz məhəbbəti.
Sərhədçi mərd olsa, hünərvər olsa, Tutar millətimin arzuları bar, Sevgilər nə qədər mötəbər olsa, Sərhədlər o qədər keçilməz olar.
Tarix nəsillərin tükənməzliyi, Hər kəs doğulduğu torpaq kimidir, Nə xoşdur paklığı, müqəddəsliyi, Vətən başımızda papaq kimidir.
Nə inlə həsrətdən, nə də ki sızla, Çalış qınamasın səni dost-tanış, Bir də danışası olsan o qızla, Telefonla deyil, ürəklə danış!
|
