Elə sən özün də bir dilə bəndsən, Sevgi pıçıldayır axı hər çiçək, Nəyi qurdalasan, nəyi tərpətsən, Bu evdə "Vağzalı" səsi verəcək, Bu qızın toyuna nə qalıbdı ki!
Gözündən yuxusu qaçandan bəri, Bu qız hədələyir intizarını, Oğlan ürəyini açandan bəri, Qız evi bağlamır qapılarını, Bu qızın toyuna nə qalıbdı ki!
Qəlbinə qulaq as, sözündən əvvəl, Burda qərar tutsun, ya orda qalsın, Ürəyi köçübdür özündən əvvəl, Köçübdü o evi sahmana salsın, Bu qızın toyuna nə qalıbdı ki!
Muraz üstündədir adaxlısı da, Bezib həsrətinin yoxuşlarından, Mətləbi duyubdur toy toğlusu da, Oxunur onun da baxışlarından: Bu qızın toyuna nə qalıbdı ki!
Bir oba üz tutub bir toya sarı, Hər sözdə-söhbətdə toy ovqatı var, Yolları kəsməyə kənd uşaqları Vurnuxa-vurnuxa ip axtarırlar, Bu qızın toyuna nə qalıbdı ki!
|
