Çay nədir, ümman keçirəm, Dağ-qaya bilmirəm, ana, Sən gedən yoldan özümü, Saxlaya bilmirəm, ana.
Məzarın üstə ot yandı, Yerimə yadlar utandı, Baş çəkib səni haçandır, Yoxlaya bilmirəm, ana.
Sındırıb dəmir tilsimi, Hönkürüb ildırım kimi, Qohum-qardaşın qəlbini, Dağlaya bilmirəm, ana
Közərmiş gözüm dan yeri, Yol ötən astadan yeri, Nə vaxtdır yaram qan verir, Bağlaya bilmirəm, ana.
Üzüm yox yanına dönəm, Söz açam, danışam-dinəm, Qurumuş bulaqdır sinəm, Çağlaya bilmirəm, ana.
Bu külək məni qovura, Dərdimi göyə sovura, Min ildir haqqı qovuram, Haqlaya bilmirəm, ana.
Əzizəm, çoxdur günahım, Qalxıb ərşə yetir ahım, Rəhmi də gəlmir Allahın- Ağlaya bilmirəm, ana.
|
