Yenə həndəvərdə kəsilib hənir,
Yenə göz yaşına dönüb arzu-kam,
Sənin həyatından vahimələnir,
Sənin ölümünə heyran oluram.
Görmüsən yolların yağırlığını,
Duymusan həsrəti səmt küləyindən,
Fil çəkməz ömrünün ağırlığını,
Ölümün yüngüldür quş lələyindən.
Hanı o coşqunluq, hanı o həvəs,
Ömrün payızıdı, durulur sular,
Sənin taleyini diləməz heç kəs,
Sənin ölümünü çoxu arzular.
Kəsmədin Tur dağı səxavətini,
Ummadın bir əvəz, qarşılıq, nədən,
Çəkmisən hamının əziyyətini,
Köçürsən heç kimə zülm eləmədən.
Gözlərin yaş olub əzəldən bəri,
Qor da işıldamır daha külündə,
Elə dəf etmisən çətinlikləri,
Qalmayıb dünyada bir müşkülün də.
Yaylığın nəm çəkib yanaq nəmindən,
Nə qırıl, nə əyil, nə çök, nə də sın,
Uç fani dünyanın cəhənnəmindən,
Qon cənnət bağına haqq dünyasının.
Kədər inildəyir, sevinc uğunur,
Ölmək dirilməkdir, deməli, sağsan,
İşıqlı dünyanın yorğunluğunu
Qaranlıq dünyada çıxaracaqsan.
Новость отредактировал admin - 13-01-2021, 20:51 |
