Qardaşım Arifə - həyat yoldaşı əməliyyat masasında olarkən
Həyat ayrılıqdır, ölüm-itimdir, Sən Allah, içində boğ həyəcanı, Canını dişinə tutan yetimdir, Unutma, bərk olur yetimin canı.
Haqqa yalvarırsan dodaq altında, Tanrı dərgahında ümid əkirsən, Xanımın otaqda bıçaq altında, Çöldə ağrısını özün çəkirsən.
Getmək istəyirsən, getməyin gəlmir, Sənsən sozalan da, rəngi solan da, Sevənlər aralı dayana bilmir, Qəlblərin orbiti yaxın olanda.
Sənin bu halına mat qalıram mən, Ruhunu, canını qoymursan dincə, Dalğa tək sahildən çəkilməyirsən, Taleyin tufanı səngiməyincə.
Yar oldu, nəhayət, sizə bəxt quşu, Gözünüz-könlünüz sevinclə dolsun, Həyat yolunuzda bu dərd yoxuşu Təki axırıncı aşırım olsun. |
