Həyat yollarında yerimək olmur, Qapsayıb hörümçək toru dünyanı, Aqillər susduqca alıb başına, Tutub cahillərin xoru dünyanı, İlahi, sən özün qoru dünyanı.
Ayı, günəşi də söndürüb tamam, Damarda qanı da dondurub tamam, Alçaldıb, çökdürüb, endirib tamam Zorba kişilərin zoru dünyanı, İlahi, sən özün qoru dünyanı.
Nə olsun, hiyləgər baş qatır yenə, Mələklər şeytana daş atır yenə, Qoymur dağılmağa, yaşadır yenə Çörəyi dünyanı, şoru dünyanı, İlahi, sən özün qoru dünyanı.
Yatmayır mərdləri, çəkir keşiyi, Döndərir cənnətə evi-eşiyi, Gələn körpələrin güllü beşiyi, Ölən uluların goru dünyanı, İlahi, sən özün qoru dünyanı.
Fələk fitnə-feli körükləsə də, İblisi qəlblərə hörükləsə də, Hər görən zülmətə sürükləsə də, İşığa yönəldir koru dünyanı, İlahi, sən özün qoru dünyanı.
|
