Həzin nəğməsini hər yana yayır, Bakının küləyi mən ağıldadır, Gah vurub dağıdır, gah sığallayır, Bakının küləyi mən ağıldadır.
Hər incə məqama, mətləbə varır, Nərəsi gecənin bağrını yarır, Qovur küçələrdən tullantıları, Bakının küləyi mən ağıldadır.
Dəyişir minillik mənzərələri, Çırpır qapıları, pəncərələri, Dağıdır, uçurur bənd-bərələri, Bakının küləyi mən ağıldadır.
Açır yaxaları, ətəkləri də, Sancır gözəlləri, göyçəkləri də, Öpür tikanları, çiçəkləri də, Bakının küləyi mən ağıldadır.
Yaxşı adamlara səs verib keçir, Yaman adamlara dərs verib keçir, Çoxunun dərsini tərs verib keçir, Bakının küləyi mən ağıldadır.
Tellərə toxunub dindirir tarı, Nə gündüz uyuyur, nə gecəyarı, Faş edir ev yıxan pıçıltıları, Bakının küləyi mən ağıldadır.
Mərddir, yad yellərə hey sinə gərir, Təravət gətirir əsintiləri, Durub seyr edirəm bayaqdan bəri, Bakının küləyi mən ağıldadır.
|
