Ana həsrətinin varmış əlacı,
Fikrim həqiqidir, sözüm səmimi,
Gəlirəm üstünə, ay gəlinbacı,
Anamın üstünə gəldiyim kimi.
Yollar dirənəndə dalana, tinə,
Könlüm səadəti bu evdə tapır,
Əvvəlki mehrlə açılır yenə,
Əvvəlki ərk ilə örtülən qapı.
Xəyala dalıram mən yana-yana,
Qəlbim qəm sacında yuxalanıbdır,
Dayanıb arxası məzarıstana,
Bu ev anamıza arxalanıbdır.
Yayılır hər yana xoş nidaları,
Açılır aynası oğlun, qızın da,
Bu həyət-bacanın şən sədaları
Çatır qulağına anamızın da!
Atırsan özünü alova, oda,
Yalnız pərvanələr bu halı bilir,
Sənin əllərinin tumarını da,
Bu ev anamızın sığalı bilir.
Bəzən incitmişik əbəs yerə də,
Yoxuşlar yormusan, dağ aşmısan sən,
Özündən neçə yaş böyüklərə də
Ana qayğısıyla yanaşmısan sən.
Boğub hiddətini, boğub bir anda,
Keçmisən içindən dumanın, çənin,
Özün çoxlarından kasıb olsan da,
Ürəyin hər qəlbdən varlıdır sənin.
Burda bağ-bağat da səndən söz açır,
Həmişə beləcə gül-çiçəklə din,
Sənin analığın elə nur saçır,
Qamaşır gözləri körpəliyimin.
İnsafa bağlıdır iman da, din də,
Mərhəmət duyğusu qəlbini sarmış,
Gəlinin yaxşısı ata evində
Sən demə, bir nəslə ana olarmış.
...Ana həsrətinin varmış əlacı,
Fikrim həqiqidir, sözüm səmimi,
Gəlirəm üstünə, ay gəlinbacı,
Anamın üstünə gəldiyim kimi
|
