Çıxmışam seyrinə el-obamızın, Qəlblər dolaşıram, yol adamıyam, Hər yerindən duran tanıya bilməz, Məni eldən soruş, el adamıyam.
Yazdır, ilhamıma qol-qanad gəlir, Ləziz duyğulardan sözə dad gəlir, Barıt da, mərmi də mənə yad gəlir, Çiçək əsiriyəm, gül adamıyam.
Göydə mələkləri izləmə nahaq, Mənanı söz altda gizləmə nahaq, Məndən hamar axın gözləmə nahaq, Daşqın dəlisiyəm, sel adamıyam.
Haramla arama çəpər çəkirəm, Güllə keçirməyən sipər çəkirəm, Torpaq da bilir ki, nələr çəkirəm, Torpaq da görür ki, bel adamıyam.
Yüksələn yollarda qatlanarmı diz, Ölərəm, qəlblərdə buraxmasam iz, Dağlarda laləyəm, düzlərdə nərgiz, Külək həsrətlisi, yel adamıyam.
Mirdamət, haqqı yaz, haqq olanı yaz, Qələm yandıranı alov yandırmaz, Hər hava könlümü havalandırmaz, Təzanə vurğunu, tel adamıyam.
|
