Yaşım yüz olsa belə,

Qadından kiçiyəm mən,

Çünki qadındır məni

Doğub ərzə gətirən.

Gözlərdən yayınıb yox olacağam,

Yerimi göstərən əlsən, ağlama,

Ağlat avazınla doğmanı, yadı,

Könül sazımdakı telsən, ağlama.

Vaxt olur, beynimdə ildırım çaxır,

Göz yaşım sel olur, qəlbimə axır,

Üzümə baxanlar nə bilsin axı

İçimdə bir şair boğulur mənim.

Kəndə gəlmək istəyirəm,

Yollar, yaman darıxmışam,

Saçım sığala möhtacdır,

Yellər, yaman darıxmışam.

Mən səni görməsəm, havalanaram

Ömür yoldaşıma

Şəkərsən bu sayaq, noğulsan belə,

Bal çəkən arıyam davranışından,

Ata ocağında doğulsan belə

Sən bizim evlisən yaranışından.

Səmtini hər gün dəyişən

Yellər zamandan gəlmədir,

Cəhənnəm kafir yığnağı,

Cənnət imandan gəlmədir.

Yanaqların çiçək kimi

Solunca getmisən, ata,

Səni axtaran fələyin

Dalınca getmisən, ata.

Yola cəsarətlə qədəm qoyursan,

Sağında-solunda qorxu görmürsən,

Sinənin qeydinə qaldığın zaman

Kürəyə yönələn oxu görmürsən.