Kəndə gəlmək istəyirəm, Yollar, yaman darıxmışam, Saçım sığala möhtacdır, Yellər, yaman darıxmışam.
Misra-misra sətirlənəm, Hörmətlənəm, xətirlənəm, Gündə yüz yol ətirlənəm, Güllər, yaman darıxmışam.
Ayrılıq bir hava çalıb, Ürəyimi oda salıb, Sazım köynəyində qalıb, Tellər, yaman darıxmışam.
Zərsizdir zərgər haçandır, Yox qəlbimə yer haçandır, Coşmur təbim gör haçandır, Sellər, yaman darıxmışam.
Kökümdən üzdürüb məni, Sərgərdan gəzdirib məni, Tənhalıq bezdirib məni, Ellər, yaman darıxmışam.
|
