Gözlərdən yayınıb yox olacağam, Yerimi göstərən əlsən, ağlama, Ağlat avazınla doğmanı, yadı, Könül sazımdakı telsən, ağlama.
Qəmin poladını əritmək olmur, Sözü uşaq kimi yeritmək olmur, İxtiyar kəsləri kiritmək olmur, Gözümün yaşını silsən, ağlama.
Olsam lap pələng də, şir də, ölərəm, Dərd adlı möhtəşəm sirdə ölərəm, Ağlasan, məzarda bir də ölərəm, Elə şad olaram, gülsən, ağlama.
Ömür buzlağımdır, hər günü buzum, Qaralıb günəşim, axıb ulduzum, Səni sağlığımda ağlatdım, quzum, Bir gün öldüyümü bilsən, ağlama.
Bağrına infarktdan çala salmışam, Ömrünü neçə il dala salmışam, Evimdən ağladıb yola salmışam, Qəbrimin üstünə gəlsən, ağlama.
|
