Haqsızlar əlindən bezən ürəyim Hər zülmə qatlaşır ömür yolunda, Elə taqqıldayır bəzən ürəyim, Elə bil qatardır dəmir yolunda.
Şübhələr doğrayan, ümidlər qıran Ayım da, günüm də para görünür, Dünən şöləsiylə göz qamaşdıran Gündüzüm gecəmdən qara görünür.
Bir göz qırpımında çıxır aradan, Mələklər uzaqdan izləyir bizi, İşıqlı dünyanı qurub yaradan Qaranlıq dünyada gözləyir bizi.
Acın çəkdiyini heç duyarmı tox, Bu da yaranışın belə halıdır, Adəm övladları doğulanda yox, Öləndə Tanrıya qovuşmalıdır.
Çoxu tək çox şeyə etmədim meyl, Ərzin hər şeyini heç edəcəyəm, Öləndə fanidən baqiyə deyil, Baqidən faniyə köç edəcəyəm.
|
