Bizi dik saxlayan kişi sözüymüş, Əyir müqavilə, şərt adamları, Həyat ağacının budaqlarında Saraldır heyva tək dərd adamları.
Sakit üfüqlərdir ömrün dan yeri, Zirvələr “gəl” deyir, çəkilmə geri, Bəzən şeş yerinə həyat yek verir, Bunu yaxşı bilir nərd adamları.
Deyək xoşməramlı söz, sevindirək, Qoyaq həyatında iz sevindirək, Axı nəkarəyik biz sevindirək, Haqq özü güldürsün pərt adamları.
Həqiqət qəlblərdə gümana bənzər, Durulan irmaqlar zamana bənzər, Mülayim kimsələr dumana bənzər, Qayadan seçmirəm sərt adamları.
Əziz, bal damaydı şirin dilindən, Ətir səpiləydi hər əməlindən, Tanrı güc verəydi, namərd əlindən Qurtara biləydin mərd adamları.
|
