İndi ki bu yolda üz-üzə gəldik, Halını soruşum, sonra gedərsən, Qoy duyum dadını bu təsadüfün, Bəxtimlə barışım, sonra gedərsən.
Dərd-ələm saranda miskin könlünü, Yuyurmu hərdənbir çiskin könlünü, Aman ver, bir qədər küskün könlünü Almağa çalışım, sonra gedərsən.
Sənə ürəyimi açandan bəri, Uşaq tək üstünə qaçandan bəri, Ürəyim boşalmır haçandan bəri, Dərdimi danışım, sonra gedərsən.
Bu görüş əbədi bir yadigardır, Dərədə dumandır, zirvədə qardır, Gözümün kökünə bənzərin vardır, Dur, boylan, sarışın, sonra gedərsən.
Yolun kənarında dərd qayasıyam, Namərd sadalayıb, mərd sayasıyam, Qarşında qupquru ot tayasıyam, Kibrit çal, alışım, sonra gedərsən.
Haqq özü şahiddir məhəbbətinə
Gözüm də sevinir, könlüm də şaddır, Bura köks ötürüb gəlməmişəm ki, Ruhum da burdadır, yalnız quruca Cismimi götürüb gəlməmişəm ki.
Yarı qəlb evinə gəl burax, gülüm, Gözləri könlümə çilçıraq gülüm, Məni görürsənmi, yaxşı bax, gülüm, Özümü itirib gəlməmişəm ki.
Ürəyim qoruyur etibarını, Bir an unutmayır könül yarını, Hardasa, kiminsə arzularını Yerinə yetirib gəlməmişəm ki.
Nə ki əfsanə var, ürəyim danır, Bu eşqin yolunda şam kimi yanır, Vüsalın yolları hələ uzanır, Həsrəti bitirib gəlməmişəm ki.
Sitayiş edirəm ləyaqətinə, Abidə qoyuram sədaqətinə, Haqq özü şahiddir məhəbbətinə, Onu mən gətirib gəlməmişəm ki.
|
