Arif olan xam xəyala qapılmaz. Qeybə çəkər əyri gözdən tiri pul, Bir fürsətdi, itirilsə tapılmaz, Bir quşdu ki, uçsa, dönməz geri pul.
Ötən günlər əfsanəydi, əfsanə, Fərq qoyulmur nə yaxşıya, yamana, Dövran dönüb, dəyişibdi zəmanə, Tülkülərə ram eyləyir şiri pul.
Güdazına getmək olar bir anın, İnsafı yox, mürvəti yox dövranın, Şəfasıyla mat qoyubdu loğmanı, Ölünü də dirildəndi diri pul.
Cingildəmir niyə daşlar, kəsəklər, Qızıl, qızıl olduğuyçun səs eylər, Vallah, bizə qəpik-quruş bəs eylər, İstəyənə qismət olsun iri pul.
Aşımızın yağlığıymış sən demə, Canımızın sağlığıymış sən demə, Üzümüzün ağlığıymış sən demə, Niyə dedik: "əlimizin kiri pul".
Mirdamətin doğru sözü kəm olmaz, Haqq evində sevinc olar, qəm olmaz, Üç şey var ki, hər adamda cəm olmaz, Biri ağıl, biri qeyrət, biri pul.
|
