Tanrım, sənə qurban olum,
Dərdi məndən uzaq elə,
Kaş ürəyim soyumasın,
Mənzilimi sazaq elə.
Babalardan dərsmi alıb
Oldun belə mətin, dünya,
O kişilər ağuşuna
Dönər bir də çətin, dünya.
Pak saxlasın qəlb evimi,
Kəniz məni incitməsin,
Damla-damla qurudaram,
Dəniz məni incitməsin.
Gözlərdən yayınıb yox olacağam,
Yerimi göstərən əlsən, ağlama,
Ağlat avazınla doğmanı, yadı,
Könül sazımdakı telsən, ağlama.
Kəndə gəlmək istəyirəm,
Yollar, yaman darıxmışam,
Saçım sığala möhtacdır,
Yellər, yaman darıxmışam.
Qızdıran çağına eşq atəşinin
Mən çata bilmirəm, çata bilmirəm,
Doğan məqamına bəxt günəşinin
Mən çata bilmirəm, çata bilmirəm.
Yağış havasına tamarzıyam mən,
Əsən meh saçımı sığallayıbdır,
Bəlkə yer üzündə baş verənlərdən
Göyün də üzündə su qalmayıbdır.
Qulağım tutulur xışıltısından,
Tökülən yarpaqlar ömrümdən gedir,
Çökür taleyimin sarayı hər an,
Sarsılan dayaqlar ömrümdən gedir.
