Yağış havasına tamarzıyam mən, Əsən meh saçımı sığallayıbdır, Bəlkə yer üzündə baş verənlərdən Göyün də üzündə su qalmayıbdır.
Alışır bağ-bağat, yanır meşələr Hər səhər günəşdən alov alınca, Sanki baş götürüb qaçır rişələr Çəkilməkdə olan suyun dalınca.
Haqqına deyil ki, əfsanədəndir, Hara sığınıbdır, hara buludlar, Gözükölgəlidir, yoxsa nədəndir, Didərgin düşübdür qara buludlar?!
Zaman insanların durub qəsdinə, Neyləsin, zəhməti puç olan fağır, Gör neçə vaxtdır ki, yerin üstünə Yağış yoxsulların gözündən yağır?!
Nə insaf qalıbdır, nə mürvət daha, Dövran, bu da sənin ədalətindir, Arxın qabağını kəsən əjdaha Yağışın yolunu zəbt edib indi.
Agah ol, dünyanın ağac ahından, Bitib-göyərəni alqışlasana, Canlı təbiətin keç günahından, Cansız təbiətə bağışlasana.
Bizə çox görmüsən damlaları da, Qoy kəsim sözünü balla, İlahi, Çəkib saxlamısan nə yuxarıda, Yağış kəndirini salla, İlahi
Dəyiş qərarını, belə dayanma, Yağışda nazlanıb çimən yanmasın, Yanım susuzluqdan, kül olum, amma Bir çiçək solmasın, çəmən yanmasın.
Rəhm elə, yer üzü batmasın yasa, Yoxsa qəddimizi yel də əyəcək, Haqqın dərgahından yağış yağmasa, Yerdə sevgilər də göyərməyəcək.
|
