Qızdıran çağına eşq atəşinin Mən çata bilmirəm, çata bilmirəm, Doğan məqamına bəxt günəşinin Mən çata bilmirəm, çata bilmirəm.
Payızda köç edən durna dəsinə, Səmada sərnişin təyyarəsinə, Ağlaş sədasına, gülüş səsinə Mən çata bilmirəm, çata bilmirəm.
Qələmim dirənib dəlicəsinə Ömrümün yarımçıq dəftərçəsinə, Bülbüllər ötüşür gül həvəsinə, Mən çata bilmirəm, çata bilmirəm.
Qalır qarış-qarış geridə yollar, Inanma, bu dərdi əridə yollar, Xeyrə də uzanır, şərə də yollar, Mən çata bilmirəm, çata bilmirəm.
“Dayan!” əmri verir ürək bədənə, Gözüm tamarzıdır əlim yetənə, Məndən bircə addım öndə gedənə Mən çata bilmirəm, çata bilmirəm.
Hər sözü qoşsaydım söz xətirinə, Bağım bələnməzdi gül ətirinə, Şeir varağımın son sətirinə Mən çata bilmirəm, çata bilmirəm.
Yıxılb dururam gündə yüz kərə, Həsəd aparıram öndəkilərə, Sözlərim yetişir getdiyi yerə, Mən çata bilmirəm, çata bilmirəm.
|
