Qulağım tutulur xışıltısından, Tökülən yarpaqlar ömrümdən gedir, Çökür taleyimin sarayı hər an, Sarsılan dayaqlar ömrümdən gedir.
Düşüncəm korşalır, söz-sözü görmür, Düz səhvi qınamır, səhv düzü görmür, Daha bu yollarda göz-gözü görmür, Qaralan çıraqlar ömrümdən gedir.
Yaşayıb görürəm anidir dünya, Insafsız, mürvətsiz canidir dünya, Puçdur, mənasızdır, fanidir dünya, Boşalan papaqlar ömrümdən gedir.
Bezirəm iztirab gətirən hissdən, Bükülən ayaqdan, qatlanan dizdən, Yığılır izlərim yoldan-irizdən, Aranlar, yaylaqlar ömrümdən gedir.
Namərd balta çalır, kürəyim yanır, Qolum heydən düşür, biləyim yanır, Dodağım çatlayır, ürəyim yanır, Çeşmələr, bulaqlar ömrümdən gedir.
Başını qaldırıb gözümə baxmır, Sönən alovuma, közümə baxmır, Saxlaya bilmirəm, sözümə baxmır, Yaxınlar, uzaqlar ömrümdən gedir.
Kimi dikəltdimsə, qəddimi əydi, Qeydinə qaldığım xətrimə dəydi, Açılan ağızlar şərəfiməydi, Büzülən dodaqlar ömrümdən gedir.
Qönçə arzularım həyata gəlir, Həyəcan yarada-yarada gəlir, Toplanır, savablar imdada gəlir, Çıxılır, günahlar ömrümdən gedir.
Dözsəm də qəlbimin dərd-sərinə mən, Vədəsiz saralan güllərinə mən, Boylana bilmirəm dan yerinə mən, Açılan sabahlar ömrümdən gedir.
|
