Arxada bir yol var, qarşıda iki,
Ah, nədən dözmədi əsəblərimiz,
Üz-üzə gələrək görüşmüşdük ki,
Söz-sözə gələrək aralanaq biz?!
Kaş ki, qayıdaydı gülün qönçəsi,
Yenidən sevməyim ağlıma batmır,
Elə zəifləyib könlümün səsi,
Ulduzlara çatır, qızlara çatmır.
Ağlaram hicrindən hey için-için,
Mənə o saçları yosun gərəkdir,
Əlimin əlinə yetməsi üçün
Qolum ekvatordan uzun gərəkdir.
|
