Könlündə min duyğu bəslərdin hər gün,
Qeybdən gələrdi sanki səsin də,
Məni kamilliyə səslərdin hər gün,
Qalmışam cahillər əhatəsində.
Sən əzab-əziyyət çəksən də bol-bol,
Alnını qırışan görməzdik bizlər,
Deyərdin, ay oğul, ədalətli ol,
Axı at oynadır ədalətsizlər.
Bircə dəfə yalan satmışdım sənə,
Yeri belimdədir o qamçıların,
Doğru danışmağı öyrətdin mənə,
Səsi göydən gəlir yalançıların.
Ömrümə zəriflik nəqş eləyərək,
Mənə gözəlliyi göstərdin hər gün,
Quzu təbiəti bəxş eləyərək,
Buraxdın içinə qurd sürüsünün.
Oğul, haqqa tapın, dərdə sığın da,
Mən bu kəlmələri mayak sayardım,
Həyat yollarının qaranlığında
Dərdin işığına addımlayardım.
Yaz boyu yağışa, qış boyu qara
Məhəl qoymayaraq, yaşa dolardım,
Sinə gərməsəydim fırtınalara,
Mən çinar olmazdım, söyüd olardım.
Qıra bilməsə də, dərd məni əyir,
Qəbrini səcdəgah bilirəm, ata,
Mən sənin yolunla irəliləyir,
Mən sənin arxanca gəlirəm, ata.
Sənə qəlb dolusu ehtiramım var,
Heyf, çıxammaram borcundan daha,
Mənim aləmimdə yaxşı adamlar
Yerdə sənə bənzər, göydə Allaha.
Новость отредактировал admin - 13-01-2021, 20:47 |
