Könül məlhəmidir dupduru suyun, Seçilmir gözümün yaşından, bulaq, Almamış olaram halallığını, Əyilib öpməsəm daşından, bulaq.
Durub hüzurunda nazlanan zaman, Gözəllər seçilməz su sonasından, Səni ayırmayıb öz anasından, Kimlər əmibdirsə döşündən, bulaq.
Eşqlə silələnib dolmusan deyə, Dərin xəyallara dalmısan deyə, Əzəldən xeyirxah olmusan deyə Çəkilmir ayaqlar başından, bulaq.
Nə yerə sığasan, nə də göyə sən, Sevən könüllərə nəğmə deyəsən, Nəbadə suyunu əsirgəyəsən Çölün heyvanından, quşundan, bulaq.
Oylağın yaranıb qonaq saxlasın, Mirdamət hüsnünü pənah saxlasın, Səni haqq qorusun, Allah saxlasın Ömrün tənha keçən qışından, bulaq.
|
