Adilikdən dahiliyə qaldırar,

Gözəlliyə can atdıran məhəbbət,

Seyrangaha yeni yolla yetirər,

Köhnə yolu yanıltdıran məhəbbət.

Bir gölə bənzərəm, elə bir gölə,

Yel vurar səthimə, qəlpələnərəm,

Bu yandan baxanlar o yanı görməz,

Düzün ortasında ləpələnərəm.

Dərd əkdirib qəm biçdirir, bara bax,

Qartallara hökm eləyən sara bax,

Dağlarının başındakı qara bax,

Demə, dərdi-səri yoxdu dünyanın,

Burdan yaxşı yeri yoxdu dünyanın.

Könül məlhəmidir dupduru suyun,

Seçilmir gözümün yaşından, bulaq,

Almamış olaram halallığını,

Əyilib öpməsəm daşından, bulaq.

Çıxmışam seyrinə el-obamızın,

Qəlblər dolaşıram, yol adamıyam,

Hər yerindən duran tanıya bilməz,

Məni eldən soruş, el adamıyam.

Həyat yollarında yerimək olmur,

Qapsayıb hörümçək toru dünyanı,

Aqillər susduqca alıb başına,

Tutub cahillərin xoru dünyanı,

İlahi, sən özün qoru dünyanı.

Xəyalımda bir an öncə

Yenə vardım ötənlərə,

Həyat bir də verilsəydi,

Qayıdardım ötənlərə.

Ömrün zirvəsindən qanrılıb baxdım,

Andım o günləri, susub, kiridim:

Anamın əlindən yapışıb qalxdım,

Yarın əllərindən tutub yeridim.