Hara gedirdiniz, qızlar, a qızlar,

Yolunuz yuxumdan keçdi bu gecə,

Siz gəlib yuxuma girməsəydiniz,

Elə deyərdim ki, heçdi bu gecə.

Nə yaman dolmusan buludlar kimi,

Gözünün yaşını tök, burax məni,

Ömründə qoyduğum xatirələrdən

Qəlbinə bir yuva tik, burax məni.

Həsrətin yolunu sevgiylə kəsdin,

Günlərin qayğısız ötüşdümü heç,

Xəstəydim, nanə tək üstümdə əsdin,

Sənə sağlığımdan pay düşdümü heç?!

Sözümün üstündə dura bilmədim,

Səni unutmağa çatmadı gücüm,

Dünən qapınıza gəlmişdim, gülüm,

Qara bayramıma çağırmaq üçün.

Düzdə qərar tutdum düz ürəyimlə,

Sinəmi yandıran köz ürəyimlə,

Bu yola düşmədim öz ürəyimlə,

Sən mənim arxamca gəlmə, yazıqsan.

Hələ yadımdadı son görüşümüz,

Elə bil ömürdən-gündən ayrıldım,

Ağac öz kökündən qopduğu kimi

Anamdan ayrıldım, səndən ayrıldım.

Arabir xəlvəti boylan, ey gözəl,

Qəlbimin başqa bir təmənnası yox,

Qara gözlərinin eldə-obada,

Vallah, mənim kimi mübtəlası yox.

Quşlar dən axtarır, nigaranam mən,

Bəlkə tapmadılar, elə qorxuram,

Ağ kağız üstündə boz kəlmələrdən

Sərçə civiltisi gələ, qorxuram.