Mən qanad açıram siz axan zaman, Uçub yetişirəm birtəhər sizə, Yetişib tuturam ayağınızdan, Quyruqlu ulduzlar deyərlər sizə. Müəllif
Ulduz var, bərq vurur çən arxasında, Ulduz var, gözündən nur qapılmayır, Nədən göy üzünün gen yaxasında Axan ulduzlara yer tapılmayır?
Gecələr göyləri bəzəyir onlar, Ölüncə zülmətə baxıb gedirlər, Yetim uşaqlara bənzəyir onlar, Ögey dünyamızdan çıxıb gedirlər.
Bu axan ulduzlar incimi, dürmü, Göy üzü dəfn edir bu qızlarını, Bulud arxasında Ay düşünürmü, İtirir ən parlaq ulduzlarını.
Axan ulduzların əzəldən bəri, Qədri el gözündə, el sözündədir, Bilinmir, hardadır son mənzilləri, Amma şəfəqləri göy üzündədir.
|
