Həsrətin aydımı, ildimi sənin, Çəkdiyini aləm bildimi sənin, Bəxtin çiçəkdimi, güldümü sənin, Daha gileylənmə öz taleyindən.
Yazın rayihəli havası gəldi, Dərdinin dərmanı, davası gəldi, Ömrünə qaranquş yuvası gəldi- Daha gileylənmə öz taleyindən.
Gözün aydın olsun, gözümün nuru, Bəxtin aydan arı, sulardan duru, Öndə yaşamalı günlərin durur, Daha gileylənmə öz taleyindən.
Qəlbini qərq edən zülməti devir, Əlini mənim də başıma çevir, Sən onu sevirsən, o səni sevir, Daha gileylənmə öz taleyindən.
|
