İlişib qalmısan səhərdən bəri, Axa da bilmirsən buludlar kimi, De, hansı dəryadan buxarlanmısan, Yağa da bilmirsən buludlar kimi.
Durub göy üzündən boylandığın yer Cənnətin firavan bölgəsi deyil, Bu kəndin üstünə düşübsə, Vallah, Bu kölgə Tanrının kölgəsi deyil.
Qaraçı köçü də ləngimir burda, Başımın üstündə dayanma belə, Bu yaşa çatınca mənim üstümə Kimsənin kölgəsi düşməyib hələ.
Apaydın göy üzü həndəvərində, Şəfəqlər ağappaq gümüş yığını, Mən sənin əlindən çıxa bilsəydim, Çəkərdim canıma gün işığını.
Tarıma çəkmə gəl əsəblərimi, Düşünmə, ay bulud, dözümdə dağam, Özün öz xoşunla çıxıb getməsən, Küləyi üstünə qısqırdacağam.
|
