Quşlar dən axtarır, nigaranam mən, Bəlkə tapmadılar, elə qorxuram, Ağ kağız üstündə boz kəlmələrdən Sərçə civiltisi gələ, qorxuram.
Görəsən, yoxsullar nə yeyib-içir, Onları anıram elə bu vədə, Bu qış ki, belə ac, belə sərt keçir, Köçər gələn ildən boz sərçələr də.
Eybi yox, kimlərsə toy-büsat qursun, Gətir yorğan-döşək, mütəkkə bir də, Qanımın donmağı bir yana dursun, Donub qələmimin mürəkkəbi də.
Odun yox, sobada yandır qamışı, Bu gündən sabaha birtəhər gedək, Onsuz da qılıncdan yadırğamışıq, Qələm tutmağı da belə tərgidək.
|
