Hər nida könlümün bir iniltisi, Hər kəlmə gözümün bir giləsidir, Getsən də ömürlük tərk edib bizi, Əksin hər ürəyə çəkiləsidir.
Yurdumun əbədi bir çırağısan, Sönməz işığında sabah görünür, Qəhrəman xalqımın sinə dağısan, Bu dağda keçilməz günah görünür.
Əyilməz olmusan polad kimi sən, Heyranam qəlbində yanan niyyətə, Çıxıb zaman-məkan ölçülərindən Artıq qovuşmusan əbədiyyətə.
Kənara düşərmi meyvə kökündən, Ha dedik öz ömür bağını qoru, Dahilər dünyadan köçdüyü gündən, Keçmirmi tarixin qəm ekvatoru?!
Çiçəkdir məzarın üstünə yağan, Alqış bu şöhrətə, şana deyirəm, Xoşbəxtəm, sənin tək bir oğul doğan, Vətənə üz tutub ana deyirəm.
|
