Atıldım qoynuna imtahanların, Əsgər şinelimi gəlmişəm geyəm, Anamı-bacımı qoruyanların, Ana-bacısının keşiyindəyəm.
Gül açıb yurdumun bağçası, bağı, Düşmüşəm baharın gül qucağına, Elə genişdir ki, vətən torpağı, Bir qarış yer yoxdur yad ayağına.
Yolum uğurludur,-bilirəm bunu! Ellər amalımı alqışlayıbdır, Mehdi tüfəngini, Babək qolunu, Koroğlu atını bağışlayıbdır.
Anacan! Dilimdən düşməyir adın, Öz balan sarıdan arxayın ol sən, Mən əsgər gedəndə evdə yatırdın, İndi lap eyvanda yata bilərsən. |
