Fikirdən-xəyaldan gəlirəm cana, Alanda əlimə əmək haqqımı, Geyinmək bir yana, gəzmək bir yana, O ki heç ödəmir yemək haqqımı.
Rəqabət aparır cib ilə ürək, Burulub heç yana axa bilmirəm, Qazanda ət bişmir, təndirdə çörək, İtin də üzünə baxa bilmirəm.
Bilmirəm, getdiyim səkimi, yolmu, Ümid aparıram, qəm gətirirəm, Çörək almaq olmur, un almaq olmur, Evə saçlarımda dən gətirirəm.
Mən niyə qınayım evdəkiləri, Ömrüm uzandıqca dilim qısalır, Amansız ehtiyac illərdən bəri Əlimi cibimdən didərgin salıb.
Çəkənlər bilir ki, kef-damaq deyil, Vallah, addımbaşı sarsılmaqdı bu, Sürünə-sürünə yaşamaq deyil, Oynaya-oynaya asılmaqdı bu...
|
