Nə yaman sıxlaşıb ömrümün çəni, Nə yaman korşalıb yaddaşım, yadım, Bir vaxt ilk baxışdan sevmişdim səni, İndi ilk baxışdan tanıyammadım.
İntizar sıradan çıxarıb, yoxsa Dərd edam eyləyib, qəm asıb səni, Saçların belə tez ağarıb, yoxsa Ömür yollarında toz basıb səni?!
Çıxdı xatirələr qılınc tək qından, Dünənə aparan yollar yağırdır, Dərdə bax, o vaxtın ayrılığından İndinin görüşü daha ağırdır.
Dünyanın xoşbəxti onda biz idik, Nə odum qalıbdı, indi nə külüm, Bir zaman dünyada ikimiz idik, İndi nə sən varsan, nə də mən, gülüm.
Özüm inanmaram, yuxum çin çıxsa, Ürəyim ümiddən-ümidə səkir, Bir vaxt gözmuncuğu axtarırdıqsa, İndi zaman bizə gözdağı çəkir.
Bağışla, qəddini bir az da əydim, Özümə gəlmərəm bu təsadüfdən, Gərək bu təklifi eşitməyəydim, Gərək bu məclisə gəlməyəydim mən.
|
