Ürəyimə qida verir, Nuşdu bu gözlərə baxmaq, Bəxtiyaram ki, bəxtimə Düşdü bu gözlərə baxmaq.
Mərhəmətlə dola-dola, Dikildikcə sağa-sola, Cənnətə yollanan yola Tuşdu bu gözlərə baxmaq.
Sehrmi, sirri-xudamı, Uzaqdan çəkir adamı, Bu gözlər Cəmşidin camı, Borcdur bu gözlərə baxmaq.
Artdıqca sanbalı hər an, Açıqdır qandalı hər an, Naz satıb can alır hər an, Xərcdir bu gözlərə baxmaq.
Bəzən gen düşdüm özümdən, Dillərdə əzbər sözümdən, Bəbəyi çıxmış gözümdən Qaçdı bu gözlərə baxmaq.
Bənzəri var aya, günə, Qürub edir sönə-sönə, Öpülmürsə dönə-dönə, Heçdir bu gözlərə baxmaq.
Əzizəm, dinmərəm hədər, Çəkilsin könlümdən kədər, Bu gözlərdən baxmaq qədər Xoşdur bu gözlərə baxmaq.
|
