Arxamca atılan qarmağı qıran, Tamah kəndirini kəsən balığam, Adətimdi üzmək axına qarşı, Köksünü şırnaqlar əzən balığam.
Tayım yox, dalğalar yormaqda mənim, Burnumla buz sədlər qırmaqda mənim, Dərya da mənimdir, qarmaq da mənim, Bəzən balıqçıyam, bəzən balığam.
Sahildən boylanan səhərlərim var, Dibsiz dəryalarım, nəhrlərim var, Dünyaca sirlərim, sehrlərim var, Sorağı dillərdə gəzən balığam.
Hərdən üzməyimdə ehtiyat olur, Mamırlar, yosunlar mənə yad olur, Suya baş vururam, ümman şad olur, Quruda qalanda dözən balığam.
Yolları uçurum, lağım tutacaq, Dağsız ürəkləri dağım tutacaq, Məni tutanları ahım tutacaq, Nahaq həmlələrdən bezən balığam.
Mənim Göygölüm yox, Xəzərim yoxdur, Ya Kürə, Araza güzarım yoxdur, Başqa balıqlara bənzərim yoxdur, Dəryanı gözündən süzən balığam, Süzüb də qoynunda üzən balığam.
|
