Gələr ad günümə bənövşələr də

Gül açar baharda arzusu, kamı,

Könlüm pərvaz edər quş tək uçanda,

Dalaram röyaya bir qış axşamı,

Açaram gözümü güllər açanda.

Yox olar şaxtalar qəm qarışığı,

Səmadan torpağa şəfəq saçılar,

Təbiət yandırar yaşıl işığı

Dağların qoynuna yollar açılar.

Bir kimsə gizlətməz öz heyrətini,

Durub şad-şalayın bu yaz səhəri

Dinlərəm bulağın hekayətini,

Boşalmır ürəyi payızdan bəri.

Bulud arxasından göz vurub düzə,

Günəş qucaq-qucaq gül-çiçək ələr,

Köçəri quşların vətənimizə

Dəs-dəs nümayəndə heyəti gələr.

Çiçəklər səksənər hər sıçrayışdan,

Nə sən unudarsan, nə mən sevinci,

Qəfil üzə çıxar torpağın qışdan

Gizli saxladığı çəmən sevinci.

Arabir könlümün kövrələn çağı

Göyləri gözünü sıxan görərəm,

Budağın üstündən düşən yarpağı

Budağın içindən çıxan görərəm.

Köhnə dostlar kimi güllər görüşər,

Sovuşar bir anda qəm də, kədər də,

Doğum tariximiz üst-üstə düşər,

Gələr ad günümə bənövşələr də.

...Gül açar baharda arzusu, kamı,

Könlüm pərvaz edər quş tək uçanda,

Dalaram röyaya bir qış axşamı,

Açaram gözümü güllər açanda.