Daha qalmayıbdı dözümü, tabı, İldırım gurlayır ittiham kimi, Dözmür haqsızlığa göyün mehrabı, Uçur başımıza köhnə dam kimi, Bu qədər alçalmaq, yenilmək olmaz, Gəlin özümüzü düzəldək bir az.
Laqeydik tarixə düşən hər izə, Gəlibdir dünyanın axırı sanki, Elə boylanırıq bir-birimizə, Əyri güzgülərə baxırıq sanki, Bu xislət bu xalqa heç olmayıb xas, Gəlin özümüzü düzəldək bir az.
Haqqın sədasına qulağımız kar, Artır gündən-günə cinayətimiz, Bir zaman yazırdıq: “dövlətimiz var”, İndi oxuyuruq “var-dövlətimiz”, Millətin ruhuna yaddır bu avaz, Gəlin özümüzü düzəldək bir az.
Özgə ruzisini kafirdir yeyən, Niyə yad malına çəkirik keşik, “Dünya düzəlmir ki, düzəlmir” deyən, İndi dünya deyil, biz əyilmişik, Nə böyük işdir ki, dünya dağılmaz, Gəlin özümüzü düzəldək bir az.
Bu qədər qəzəbə, bu qədər hirsə Dözə bilərikmi daşanda səbir, Haramdan əlimiz çəkilməyirsə, Tamah dişlərimiz çəkilməlidir, Ərşə dirənməmiş üsyan, etiraz, Gəlin özümüzü düzəldək bir az, Gəlin özümüzü düzəldək bir az.
|
