Hərdən mürgüləyirəm, Ayaq üstə yatıram, Sayıqlığı itirib Yanlış addım atıram, Ayaqlarım ağrıyır.
Bəzən yağış suyu tək, Hər çuxura axıram, Bir yerdə qərar tutan Ağaclara baxıram, Ayaqlarım ağrıyır.
Kimlər keçib bu yerdən, Eşidib mat qalıram, Yollar dərdini deyir, Ürəyimə salıram, Ayaqlarım ağrıyır.
Tüstü başdan çıxırmış, Ürək oda yananda, Nadanların önündə Farağat dayananda Ayaqlarım ağrıyır.
Ötən çağlar qayıtmır, Tapmaq olmur itəni, Səyahətə çıxıram Qarabağsız Vətəni, Ayaqlarım ağrıyır, Ayaqlarım ağrıyır.
|
