Başım çəkənləri yad etsəm bir-bir, Onda qalaq-qalaq kitab bağlaram, Dağlıq Qarabağa gör neçə ildir Dağlı Qarabağım deyib ağlaram. Müəllif
Abşeronda hər qayanın, hər dağın, Hər süxurun çatlamağı nə deyir, Qarabağda həsrət çəkən torpağın, Bakıdamı partlayıbdır ürəyi?!
Su həsrətdir nəğməsinə quların, Soruşmuşam Qaragölün özündən, Allah, rəngi qızarıbdır suların, Qanmı sızır çeşmələrin gözündən?!
Köksündəki alova bax, oda bax, Dinəmmirəm, dodağımı yandırır, Elə qızıb qəzəbindən bu torpaq, Qarda belə ayağımı yandırır.
Möhnətini çəkir ötən çağların, Yel də əsmir, dərdlərini yayalar, Boyu yaman alçalıbdır dağların, Dikəldəmmir qamətini qayalar.
Üzr istəyib bizdən həssas daşlardan, Gərəkdimi hər sirrimi açam mən?! Yurda salam göndərirəm quşlardan, Qanadlarım açılmır ki, uçam mən.
Yurd həsrəti qəddimizi əymirsə, Bu, köksümdə sağalmayan yaramdır, O yerlərə ayağımız dəymirsə, Burda gəzib dolaşmaq da haramdır.
Kor ol, bulaq, düşmən içir o suyu, Tükənərmi dərdi, qəmi yurdumun, Burda bülbül, orda bayquş oxuyur, Var cənnəti, cəhənnəmi yurdumun.
Məhəbbətim qarışıbdır nifrətə, Üzüm gülür, gözüm nəmdir, ay ellər, Cəhənnəmim dönməyincə cənnətə, Cənnətim də cəhənnəmdir, ay ellər!
15.12.2012 |
