Aman fələk, kənar gəz, Bizlə işin olmasın, Gözə girir iynələr, Bizlə işin olmasın.
Kim deyir dərdi unut, Ya qan uddur, ya qan ud, Əyrilərə divan tut, Düzlə işin olmasın.
Ay çöhrələr nəqqaşı, Yanaqlardan sil yaşı, Elə düzəlt ki qaşı, Gözlə işin olmasın.
Başdan-başa xatasan, Atma bizi oda sən, Bax, bu astar, bu da sən, Üzlə işin olmasın.
Şimal-cənub cəhətmi, Nə ölçümü, nə hədmi, Başına yol qəhətmi, İzlə işin olmasın.
Hökmün bircə hovurdu, Qurbanını qovurdun, Külü göyə sovurdun, Közlə işin olmasın.
Əs Mirdamət, əs indi, Təngiyən nəfəsindi, Altmışa çat, bəsindi, Yüzlə işin olmasın.
|
