Dünən qədəm qoydum Ağcayazıya, Kənd miskin çağıma xoş gəldin dedi, Kədərdən don geydi atamın səsi, Sönən ocağıma xoş gəldin dedi.
Oğul istəyirəm, od vura, yanam, Haqqım yox, özümü bir övlad sanam, Xəzan güllərinə bənzədi anam, Solan yanağıma xoş gəldin dedi.
Hanı cənnətməkan gördüyüm otaq, İçində ömür-gün sürdüyüm otaq, Qaraldı gözlərim, girdiyim otaq Hisli çırağıma xoş gəldin dedi.
Lacivərd göylərin tutuldu rəngi, Boz oldu, pozuldu ömrün ahəngi, Boğazı qurumuş nənəm səhəngi Batan bulağıma xoş gəldin dedi.
Çiçək budağında xarı göstərib, Çinar yarpağını sarı göstərib, Bozdağ ətəyində qarı göstərib, “Qaynar” qucağıma xoş gəldin dedi.
|
