Açıldı göylərə yerin ağuşu, İldırım yenəmi tək gətirəcək, Ya rəbb, səngiməsə bu yaz yağışı, Keçəllər, kosalar tük gətirəcək.
Az qalır budaqda tumurcuq dinə, Bu bir mənzərəmi, yoxsa sərgimi, Novruz şərəfinə, bahar eşqinə Çiçəklər açılır fişənglər kimi.
Başlanıb quşların toyu-düyünü, Onların səhnəsi çöl-çəmənidir, Vətənin əlində bu bayram günü Hər taxıl zəmisi bir səmənidir.
Könlüm yurd yerinin seyrinə dalır, Qaçan quzulardı, qovan uşaqlar, Belə ki, çoxalır saçı-saqqalı, Dəllək axtaracaq payızda dağlar.
Suya çəkiləcək su çərşənbəsi, Falçılar qızlara fal açacaqdır, Sevgi aləminin yer tərpənməsi Qapalı qəlblərə yol açacaqdır.
Yumurta döyüşmək yazın "xətası", Kiminsə gözündə ildırım çaxdı, Bu anac toyuğun daş yumurtası Hələ çox qəlbləri sındıracaqdır.
Tonqal üzərindən atılıram mən, İçim də, çölüm də nura boyanır, Dərdimiz-odumuz töküldüyündən Novruz tonqalları belə gur yanır.
Şerin bitdiyini elə bil duyub, Bacadan bir papaq atdılar bu dəm, Bu şeri papağın içinə qoyub Papaq atanlara pay göndərirəm.
|
